مخرجة ريستارت ترد على طارق الشناوي: “الفيلم جالك على الجرح”
تصاعد الجدل الفني حول فيلم “ريستارت” بعد أن ردت المخرجة سارة وفيق بقوة على انتقادات الناقد الفني طارق الشناوي، الذي وصف الفيلم بأنه “فاضي ومفيهوش موضوع”.
عبر منشور شاركته على صفحتها الرسمية على فيسبوك، عبرت وفيق عن غضبها واستيائها من تصريحات الشناوي.
مخرجة ريستارت ترد على طارق الشناوي
في ردها الذي نشرته، قالت سارة وفيق موجهة حديثها لطارق الشناوي: “أستاذ طارق الشناوي في فرق كبير بين الإهانة وبين النقد.
كما أضافت: حضرتك بتقول إن مفيش موضوع في الفيلم ودي حاجة ضحكتني جدًا لأن إحنا بنتكلم عن موضوع الساعة، موضوع العصر، أكبر موضوع بيهمنا ويخصنا حالياً”.
ربطت المخرجة انتقادات الشناوي بفكرة “التريند” التي تناولها الفيلم، مضيفة: “كلامك فكرني بمشهد في الفيلم للفنان محمد ثروت وهو بيقول أنا أعمل أي حاجة عشان أبقى تريند (إحنا خدامين التريند) وسمع كلام الجوكر (الفنان باسم سمرة) اللي بيشتغل لأغراض ناس.
كما تابعت: مبروك يا أستاذ طارق عرفت تبقى تريند من غير ما تنقد الفيلم. تخبط في القائمين على العمل بعيد عن العمل نفسه ولا اتكلمت عن إيجابياته ولا سلبياته.
وواصلت: لا ههاجم أشخاص وبكده هطلع تريند بسرعة ده موضوع الفيلم اللي أنت ما فهمتوش أصلاً ولا هو جالك ع الجرح؟.
كما هاجمت: وعلى فكرة أنا كمان بعرف أعمل تريند وهنطلع تريند أنا وأنت.
بس أنا على حق وهمنشنك عشان تظهر بسرعة”.
شوف الفيلم وبعدين انتقد وبلاش سطحية
كما أكدت: “أنت بتقول إن أغنية المقص عجبتك بس هي مش داخل الفيلم.
لا يا أستاذ طارق الأغنية في الفيلم بس شكل اللي بيمليك اتلخبط.
وواصلت: ادخل شوف الفيلم اللي أنت مشوفتوش واحكم عليه بنفسك وبلاش الأفكار السطحية اللي بتقولها على كل الأفلام، لأنك لو شوفت ريستارت فعلاً كنت هتعرف إن قصته أهم ما فيه.
كما تابعت: وبعدين حضرتك بتتكلم عن أدوات المخرج والمؤلف ولم تستخدم أدواتك كناقد فني ياريتك قولت حاجة نستفيد بيها بدل ما أنت طالع ترمي إفيهات وإفيهات وحشة كمان”.
كما ردت وفيق على أي تشكيك في نجاح الفيلم جماهيرياً.
وأشارت إلى: “الرقم اللي متحقق جوه مصر وبرا مش مجاملة يا أستاذ طارق ده الجمهور الحقيقي اللي بنخاطبه دول مش ولاد أختي مثلاً”.
“ريستارت” يتجاوز 50 مليون جنيه إيرادات في مصر
كما اختتمت المخرجة سارة وفيق ردها بالكشف عن الإيرادات التي حققها فيلم “ريستارت”.
وأكدت أنها تخطت 50 مليون جنيه في مصر فقط.
وذلك بعد أيام قليلة من طرحه في دور العرض السينمائي.
وقالت: “الفيلم لسه نازل وداخل على خمسين مليون داخل مصر فقط ودا نجاح مفرح كل صناعه الحمد لله.
على العموم دي كلمتك ورأيك والجمهور قال كلمته برضو”.
جدير بالذكر أن فيلم “ريستارت” يضم في بطولته كلاً من تامر حسني، هنا الزاهد، باسم سمرة.
بالإضافة إلى محمد ثروت، وعصام السقا وغيرهم.
الفيلم من إخراج سارة وفيق وتأليف أيمن بهجت قمر، ويتناول قضايا ومشاكل السوشيال ميديا وسلبياتها في المجتمع.
مواضيع متعلقة
- خناقة يارا تامر و أروى قاسم.. “كيد النسا” يخرب بيت مسلم
- موعد ومكان جنازة جدة إيمي سالم
- رسالة غامضة من “دنيا سمير غانم” تثير قلق جمهورها
- ياسمين صبري تتجاهل محمد رمضان بسبب “المشروع X”
